مربعات نيلية
مربعات نيلية
شعر / محمود عمار الزلبانى
==============
أول كلامى باسمى
بأسم رب البرية
يا مصر حبك فى دمى ...
دا انتى روحى وعنيا
----------------------
لشهد نيلك نغنى
زلال سكر مكرر
بحبك من صغر سنى
وروحى فداكى واكتر
------------------
يا نيل ياللى بتجرى
يا ابو مية صافية تسر
غرامك فى روحنا بيسرى
يا عزيز يا ابو قلب حر
-------------------------
من بدرى قدمنا قرابين
عروسة حلوة تضحى
صلو على ضفافك فراعين
يا نيل يا مزودلى فرحى
--------------------------
يا نيل يا نهر السعادة
يا محنى كف الغلابة
يا معلم مصر الريادة
من غيرك تاكلنا الديابة
-----------------------
يا نيل يا وهبنا حضارة
وياك يا ما غنت سواقى
صانوك ولد الامارة
وبيك خضرنا الشراقى
------------------------
على حبك قامت مصانع
وبيدك زرعت الحنان
ومن خيرك عملنا مزارع
وعلى سطك عشنا الامان
---------------------------
فرحانة فيك المراكب
والحب ع الشط شاهد
وصحبة ناسية المتاعب
حادوا وقالو يا واحد
-------------------------
يا معلم الدنيا السياحة
يا نيل يا ابو شط عايق
يا معلم الناس الملاحة
يا ابو سطح صافى ورايق
-------------------------
-يا نيل مش بس مية
الدم جوانا منــــــــــك
احنا حمام الغيــــــــــة
ولا نقدر نستغنى عنك
--------------------------
صياد وفارد شباكه
وعمرك ما كنت بخيل
الرزق داخل شباكه
يا بلسم لجرح العليل
-----------------------------
مديت ايديك للصحارى
بعد ما كانت سراب
صبحت مزارع تدارى
وتحضن حتى التراب
-------------------------
-أهداك لينا الالاه
ولمصر أم العروبة
دا انت شريان الحياة
تتيسر معاك الصعوبة
------------------------
محفوظ من رب عالى
سامع دعانا يا نيل
سهرنا معاك الليالى
نغنى نقول يا جميل
----------------------
يحميك لمصر الحبيبة
صافى ورايق بتجرى
يكفيك شر المصيبة
وتعيش لمصرناتسرى
********
شعر |((محمودعمار الزلبانى)))
تعليقات
إرسال تعليق