علي لحنك بقيت زمار
علي لحنك بقيت زمار
بقلم / أبو سلمي الشاعر
.....................................
وراسم من عيونك قصر
انا الحارس بقول اشعار
أنا حرفي الامل والسحر
انا الواصل ما بين بحرين
بموت في عينيكي يا بهية
بشوف قلبك مدائن شوق
لكن عاشقه الملاغيه
ما انا حبك ماسكني بطوق
تاريخ زى الفواعليه
وقوليلي ازاي اعيش مخنوق
وانفاسك هوا ليا
واشوفك من عيون روحي سمار
بيشد ف الهمه
ده قعدة عيلة غلبانه دفاهم
بس في اللمه
وبتمرجح في وسط شوارعك الخايفه تناديني
تلاقيني
شايلك وقت ضعف الكون مناديلك ما انا نيلك
أن اللي جاي اشكيلك وخوفي
بجد مش حاله
ده قصة عشق ورساله تقولك
عيشي من دمي
يا حضن الحضن يا امي انا لوني
دموعك لما تتبغدد علي ضعفي
اجيب الكل يشهد لك جواز عرفي
عشان العقد يبقي حلال ومستوفي
وايه الحب غير اشهار
مقامك يبقي ضلايه وقلبي مزار
يعدي البحر ويسبح ويتغندر
ومهما السحر بيجرح ولا يقدر
يدنس اسمك الطاهر
لكني عرفت ف الاخر
سبب ألمك عشان البر لو لمحك
هيتحول خضار ناصع
يداوى فينا يا مواجع
حبيبك اللي كان راجع
مهوش راجع
فلا مانع شويه صبر من عمري
لحد ما ينتهي عمري
واشوفك من عيون قبري
عروسه بتبهر الدنيا
اكيد ثانيه
بتفصل في الحياة والموت
ما انا اللي كنت في الملكوت
يا دوب زمار
فنان يا كبير
ردحذف